-1 °С
Ҡар
Бөтә яңылыҡтар
ӘҘӘБИ БИТ
15 Февраль 2021, 18:09
Шиғриәт тулҡынында
Ҡыйғы районы Ҡөлмәт ауылында тыуып үҫкән, бөгөн Ульяновск ҡалаһында йәшәүсе яҡташыбыҙ Флорис Сабирйән улы Ғәлимйәновтың яңы китабынан шиғырҙарҙы һеҙҙең иғтибарға тәҡдим итәбеҙ.
Ҡыйғы районы Ҡөлмәт ауылында тыуып үҫкән, бөгөн Ульяновск ҡалаһында йәшәүсе яҡташыбыҙ Флорис Сабирйән улы Ғәлимйәновтың “Мәңге һүнмәҫ йондоҙ” исемле яңы китабынан (2020 йыл) шиғырҙарҙы һеҙҙең иғтибарға тәҡдим итәбеҙ.
БЕҘҘЕҢ АУЫЛ
Һары таш башынан беҙҙең ауыл
Ус төбөндә кеүек күренә.
Иҫкә алһаң үткән ғазаптарын,
Һағыш үрләй йөрәк түренә.
Ҡыҙылдар менән аҡтар һуғышҡан
Ҡылыс менән, атҡа атланып.
Мишәрҙәрҙең тәрән окоптары
Тау башында ҡалған һаҡланып.
Бөйөк Ватан һуғышы ҡырынан
Ир-егеттәр өйгә ҡайтмаған.
Тол ҡатындар балалары менән,
Бикләмәйенсә, көткән ҡапҡанан.
Кешеләр аҫтан һоҡланып ҡарай
Бөркөт ҡунған ҡая ситенә.
Бейек Йәһүҙә менән Һуҡма таш
Кереп ҡалған тарих битенә.
Теҙелеп киткән өйҙәр артынан
Йәшел баҡсалары һуҙылған.
Хужаһыҙ ҡалған өйҙәр эсендә
Тормош күптән инде туҙылған.
Әй йылғаһы боғаланып аға,
Ҡаршы ярҙа – нарат урманы.
Был ярында шишмә һыуҙарының
Эсеп туя алмай торғаны.
ҮТКӘН ЙӘШЛЕК
Иҫкә төшөрһәң үткән йәшлекте,
Киң урамдар беҙгә тар ине.
Гармунда һыҙҙырып, йырҙар йырлап,
Таң аттырған саҡтар бар ине.
Яҡын итмәнек ялған дуҫтарҙы,
Түргә сабата элгәндәрҙе.
Юрғанға ҡарап аяҡты һуҙҙыҡ,
Эшләнек ҡулдан килгәндәрҙе.
Үрелмәнек янған йондоҙҙарға,
Булмағанға башты ватманыҡ.
Алма беш тә, ауыҙға төш, тиеп
Күккә ҡарап ерҙә ятманыҡ.
ЯҢЫ МОДА
Беҙҙең йәшлек күктән төшмәһә лә,
Әле һаман әйбәт күренә.
Сибәр ҡыҙҙар матур күлдәк менән
Һеңеп ҡалған күңел түренә.
Урамдарҙа күрәм йәш ҡыҙҙарҙы –
Балаҡтары тишек салбарҙа.
Шәрә боттары ялтырап ҡала
Юлдарынан барған саҡтарҙа.
Юйып булмай, йөрәктәргә үткән,
Заман ҡалдырған таптарҙы,
Бала саҡта кейә торған инек
Ағайҙарҙан ҡалған салбарҙы.
Эшкә бара йыртыҡ салбар кейеп
Күрше ҡыҙы – оҙон Фәрзәнә.
Яңы мода килеп сыҡҡан икән
Онотолған иҫке нәмәнән.
* * *
Һине һағынам айлы кистәрҙә,
Һине уйлап яна йөрәгем.
Бәлки, оноторһоң, тик шулай ҙа
Был йырҙарым – һиңә бүләгем.
Йәшлегемдә, бөҙрә ҡайындарҙай,
Тик һин генә яҡын тойолдоң.
Тик һин генә тартып алдың
Ҡайғыларын минең уйымдың.
Моңло йырың, серле ҡараштарың
Дәрт тыуҙыра ине күңелгә.
Ҡарлығандай ҡара күҙҙәреңде
Онота алманым ғүмергә.
Таң нурҙары ергә һибелгәндә,
Йондоҙҙар ҙа һүнә күгендә.
Ә һин мәңге һүнмәҫ йондоҙ булып
Ҡалдың минең йөрәк түремдә.
* * *
Тыуған яғым, мин һағынып ҡайтам,
Аҡҡош ҡайтҡан кеүек күлеңә.
Ғорур баҫып ҡара тупрағыңа,
Күкрәгемде ҡуйып елеңә.
Ҡайтыуымды күреп һөйөнгәндәй,
Ҡул болғайҙар йәшел яландар.
Ҡунаҡ көтөп алған хужа төҫлө
Юлға баҫҡан йүкә-баландар.
Аҡ ҡайындар ҡосағына ала,
Алған кеүек әсә балаһын.
Һыуын эсәм һалҡын шишмәләрҙең,
Һулап туя алмайым һауаһын.
Читайте нас:
© 2020-2024 Сайт издания "Беҙҙең Ҡыйғы"
Свидетельство о регистрации ПИ № ТУ 02-01392 от 12.08.2015г. Выдана Управлением Федеральной службы по надзору в сфере связи, информационных технологий и массовых коммуникаций по Республике Башкортостан. Главный редактор Исмагилова С.Ф.
Телефон
8 (34748) 3-09-84
Электрон почта
Адресы
Республика Башкортостан, Кигинский район с. Верхние Киги, ул. Советская13
Реклама хеҙмәте
8(34748) 3-09-69
Ҡабул итеү бүлмәһе
8(34748) 3-07-05