Ҡотороу – кеше һәм хайуандар өсөн ҡурҡыныс сир

Сирләүсе хайуан һаҡлыҡ тураһында онота һәм маниакаль ныҡышмалылыҡ менән тауыш сығанаҡтарына, йәғни ауылдарға килергә тырыша. Йорт хайуаны теләһә ниндәй сир менән ауырып киткән осраҡта кисекмәҫтән ветеринарға мөрәжәғәт итергә кәрәк.

Хайуандың тәбиғи булмаған ҡылығы, туҡтауһыҙ йүгерергә ынтылыуы. Уның башы һәм ҡойроғо түбән төшкән, яңағы, теле һалынған була, һеләгәйе аға. Бындай хайуанды күргәс, ҡурҡытырға теләп, ҡулдарығыҙҙы һелтәргә, ҡысҡырырға ярамай. Бының кире эффект биреүе мөмкин – йәнлек тауышҡа бороласаҡ һәм һеҙгә ташланасаҡ.

Ҡотороу – йоғошло сир. Ул ҡырағай һәм йорт хайуандары, шулай уҡ кеше өсөн үтә лә хәүефле. Үҙәк нервы системаһын етди зарарлап, 100% осраҡта үлем менән тамамлана.

Хайуан йәшәү урыны буйынса теркәлгән булырға, уға ҡотороуға ҡаршы прививка яһалырға тейеш. Сиргә ҡаршы иммунитет прививка яһалғандан һуң 4 аҙна үткәс кенә барлыҡҡа килә һәм 1 йылғаса һаҡлана. Ҡотороуға ҡаршы прививканы йыл һайын яһатырға кәрәк! Эт һәм бесәйҙәрҙең кәм тигәндә 80–90 процентына прививка яһалыуы мөһим.

Ихатала, ауыл эсендә ҡырағай хайуан йөрөүен күрһәгеҙ, үҙегеҙҙе һәм тирә-яҡтағы кешеләрҙе хәүефтән һаҡларға тырышығыҙ. Һәр ошондай осраҡ тураһында райондың ветеринария хеҙмәтенә хәбәр итеү мотлаҡ.

Йорт хайуандарының ҡотороу менән ауырыуын киҫәтеүҙең берҙән-бер сараһы – антирабик прививкалар, уларҙың һөҙөмтәлелеге мөрәжәғәт итеү срогына бәйле. Был прививкалар бушлай яһала. Һәр кисектерелгән көн ҙур хәүеф тыуҙыра.

Ҡыйғы ветеринария станцияһының белешмәләр хеҙмәте телефоны: 3-04-01; 8-963-236-70-58.

Райондың барлыҡ халҡының профилактик эштә ҡатнашыуы, хайуандарҙы аҫрау ҡағиҙәләрен үтәүе ҡотороу кеүек ҡурҡыныс сиргә ҡаршы көрәштә уңыш нигеҙе булып тора.