Башҡортостан делегацияһы Көнсығыш иҡтисади форумында эшен тамамланы

Башҡортостан делегацияһы Владивостокта уҙған Көнсығыш иҡтисади форумында эшен тамамланы. Форум йомғаҡтары буйынса 36 милллиард һумлыҡ капитал һалыуға инвестиция ниәттәре тураһында документ – «Таурус» яуаплылығы сикләнгән йәмғиәте менән Стәрлетамаҡ районында Ғүмәр ятҡылығы базаһында кальцийлы сода етештереү буйынса завод төҙөү буйынса килешеү төҙөлдө.

Форум даирәләрендә Рәсәйҙең иҡтисади үҫеш министры урынбаҫары Вадим Живулин, Рәсәйҙең тура инвестициялар фонды генераль директоры урынбаҫары Александр Малах, Внэшэкономбанк рәйесе урынбаҫары, «Моноҡалаларҙы комплекслы үҫтереү» программаһы етәксеһе, Моноҡалаларҙы үҫтереү фонды генераль директоры Ирина Макиева һәм Ҡытай ассоциацияһы ҡарамағында Рәсәй үҙәге генераль секретары Хэ Чжэньвэй менән һөйләшеүҙәр булды. Шулай уҡ «Тау» компаниялар төркөмө, «ФосАгро-Регион» яуаплылығы сикләнгән йәмғиәте һәм Мәскәүҙә Hitachi Ltd акционерҙар компанияһы вәкиллеге етәкселеге менән.

Был осрашыуҙар республика етәкселеге бизнес һәм үҫеш институттары менән һөҙөмтәле тура элемтә төҙөү маҡсатында ойошторолдо, тип хәбәр иттеләр Башҡортостандың Иҡтисади үҫеш министрлығында.

Делегация ағзалары инвесторҙарға инфраструктура яғынан булышлыҡ итеү, эшҡыуарлыҡ мөхитендә системалы үҙгәрештәр менән идара итеү механизмдарына, шулай уҡ эшҡыуарҙар тап килгән проблемаларға арналған панель сессияларҙа ҡатнашты.