БАЛАЛАР КҮҢЕЛЕНДӘ МУЗЫКАҒА, СӘНҒӘТКӘ ҺӨЙӨҮ УЯТА

“Башҡортостан Республикаһы мәктәпкәсә мәғариф ойошмаһы иң яҡшы педагогы” республика конкурсы лауреаты Марина Петровна Кашапова мәғариф өлкәһендәге күп йыллыҡ хеҙмәте, йәш быуынды тәрбиәләүҙә ирешкән уңыштары өсөн “Рәсәй Федерацияһының Почетлы тәрбиә һәм мәғариф хеҙмәткәре” билдәһе менән наградланды.

Ул оҙаҡ йылдар Үрге Ҡыйғы ауылындағы 1-се “Ҡояшҡай” балалар баҡсаһында музыкаль етәксе булып эшләй.

М. Кашапова – педагогтар династияһынан. Әсәһе Лариса Мансур ҡыҙы, өләсәһе Нина Василевна, ҡарт өләсәһе Феония Михайловна шулай уҡ педагог булған. Үрге Ҡыйғы ауылы 1-се урта мәктәбендә 8-се класты тамамлағас, Өфө 2-се педагогия училищеһында музыка уҡытыусыһы, мәктәпкәсә учреждение музыкаль етәксеһе һөнәрен ала. Уҡыуын тамамлағас, тыуған ауылына ҡайта һәм бына 29 йыл кескәй балалар менән эшләй.

Марина Петровна өйөндә һөйөклө ҡатын, күп балалы әсә һәм ҡайғыртыусан өләсәй. Тормош иптәше Руслан Роберт улы менән дүрт бала тәрбиәләйҙәр. Өлкәндәре тормошта үҙ урынын тапҡан инде, кеселәре мәктәптә белем ала. Талантлы ҡатын буш ваҡыттарында ҡул эштәре менән шөғөлләнә, төрлө әйберҙәр бәйләй, сигә, сәйләндән төрлө әйберҙәр, бижутерия яһай. Һуңғы ваҡытта ҡағыҙ сыбыҡтан төрлө әйберҙәр үреү менән мауыға. Ул яһаған кәрзиндәр, һауыттар, этажеркалар үҙенсәлекле һәм матур булыуы менән һоҡландыра.