«Китап» нәшриәте Зәйнәб Биишеваның 110 йыллығына юбилей саралары үткәрә

Зәйнәб Биишева исемендәге Башҡортостан «Китап» нәшриәте Башҡортостан Республикаһының халыҡ яҙыусыһы Зәйнәб Биишеваның 110 йыллыҡ юбилейына һәм Башҡортостан «Китап» нәшриәтенә уның исемен биреүгә 10 йылға арналған тантаналар уҙғара.

Башҡортостандың Матбуғат һәм киң мәғлүмәт саралары агентлығында хәбәр итеүҙәренсә, юбилей саралары 23 мартта Октябрь проспекты, 2 адресы буйынса нәшриәттең тамаша залында үтә. Көндөҙгө беренсе яртыла Зәйнәб Биишева һәйкәленә сәскә һалалар. Сәғәт икелә – төп саралар башлана.

Башҡортостан «Китап» нәшриәте 1919 йылда ойошторолған. Башҡорт, рус, татар, шулай уҡ Башҡортостандың башҡа халыҡтары телдәрендә нәфис, ғилми-популяр, уҡытыу-педагогик, балалар, мәҙәни-мәғрифәт, тыуған яҡты өйрәнеү әҙәбиәте һәм һынлы сәнғәт продукцияһы сығара. Рәсәйҙең Китап сығарыусылар ассоциацияһы ағзаһы. 1992 йылда нәшриәт «Китап» тип йөрөтөлә башлай, 2007 йылда уға башҡорт яҙыусыһы Зәйнәб Биишеваның исеме бирелә.