Рәссамдарға ярҙам кәрәк

Проектта беҙҙең район исеменән талантлы рәссамдар: атҡаҙанған мәҙәниәт хеҙмәткәре Евгений Белоусов, Зөлфиә Квасняк, Полуван Шнуров, Наталья Мурзина, Илдус Закиров һәм Зилә Буровалар ҡатнаша.
Сәнғәт байрамына йыйылыусыларҙы сәләмләп, район хакимиәте башлығы Шамил Мөхәмәтдинов сараны ойоштороусыларға рәхмәт белдерҙе һәм Ҡыйғы еренең барлыҡ сәнғәт жанрҙары буйынса таланттарға бай булыуын билдәләп үтте.
Проекттың авторҙары фекеренсә, ул халыҡ рейтингын төҙөү өсөн, төбәктең барлыҡ рәссамдарының эштәрен берләштереүгә йүнәлтелгән. Ойоштороусылар төбәктең сәнғәт брендын булдырыуҙы, шулай уҡ Башҡортостан рәссамдарын тотош илгә танытыуҙы төп маҡсат итеп ҡуя. Республика рәссамдарының барлыҡ эштәрен сайтта ҡарарға мөмкин: artrb.ru.
Рәссамдарға музыкаль ярҙамды ижади десант күрһәтте, уның эсенә билдәле артистар ингәйне: “VIA ЧАППА” рэп-төркөмө, “Old School” төркөмө йырсыһы Евгения Сафина, проекттың арт-директоры, бард, автор-башҡарыусы Рәмил Бәҙәмшин. Осрашыуҙы “Вся Уфа” телеканалы алып барыусыһы Денис Ғәниев алып барҙы. Ҡунаҡтар ҡыйғыларға яҡшы кәйеф һәм Н. Мәхмүтовтың “Башҡортостандың яратҡан рәссамдары” китабының тәүге баҫмаһын бүләк итте.