Татарстанда танылған йырсы Әлфиә Афзаловаға һәйкәл асылды

Татарстанда танылған йырсы, күрше туғандаш республика, шулай уҡ Башҡортостан тамашасыларының яратҡан йырсыһы Әлфиә Афзаловаға һәйкәл барлыҡҡа килде. Һәйкәл Яңы татар биҫтәһе зыяратында уның ҡәбере өҫтөнә ҡуйылды, тип хәбәр итә «Татар-информ». Йырсы сәхнә образында — концерт күлдәгендә һәм ҡулына микрофон тотоп тора. Скульптураның авторы — Фәнил Вәлиуллин.

Һәйкәлде асыу тантанаһында Татарстандың мәҙәниәт эшмәкәрҙәре, йырсының коллегалары ҡатнашты. Ҡазан уртаһында артисҡа һәйкәл ҡуйыу, уның исемендәге музей асыу, исемен Гиннестың Рекордтар китабына индереү тәҡдимдәре яңғыраны.

Ошо көндәрҙә популяр йырсы Салауат Фәтхетдинов татар йыр сәнғәтенең ике легендаһы — Әлфиә Афзалова һәм Илһам Шакиров — йәнәш торған һәйкәл ҡуйыу тәҡдиме менән сығыш яһаны.

Әлфиә Афзалова (1933-2017) — легендар йырсы, Рәсәйҙең атҡаҙанған артисы, Татарстандың халыҡ артисы, уның тормошо һәм ижады Башҡортостан менән тығыҙ бәйләнгән. Буласаҡ йырсының бала сағы Башҡортостандың Краснокама районында үткән. Уның йырҙарын күптәр яратып тыңлай, улар йыр сәнғәтенең ҡиммәтле хазинаһы булып тора.

Сығанаҡ http://www.bashinform.ru/bash/1358827/