“Кәжегер” йәнә лә “Өлгөлө театр” исемен раҫланы

Төп ролде (Ҡаҙ батшаһы) Үрге Ҡыйғы ауылы лицейының 2-се класс уҡыусыһы Аделина Абдуллина оҫта башҡарҙы.

Ҡарға ролен башҡарған Яҙгөл Ураҙгилдина (лицейҙың 8-се класы уҡыусыһы), ҡаҙ бәпкәләре булып уйнаусы ҡыҙҙар һәм малайҙар ҙа шулай уҡ бары тик маҡтау һүҙҙәренә лайыҡ.

Белгестәр Үрге Ҡыйғы ауылы 2-се урта мәктәбенең 6-сы класс уҡыусылары Наҙгөл һәм Яҙгөл Ғафароваларҙың ролдәрҙе яҡшы башҡарыуын билдәләп үтте.

Спектаклдә 15 бала ҡатнаша. Иң кескәй артистарҙы карантин саралары арҡаһында премьераға саҡырманылар. Ошо уҡ сәбәп буйынса сара тамашасыларҙан башҡа үтте.

Жюри рәйесе – Республика халыҡ ижады үҙәгенең театр сәнғәте буйынса баш белгесе, Башҡортостан Республикаһының атҡаҙанған мәҙәниәт хеҙмәткәре, Башҡортостан Республикаһы һәм Рәсәй театр эшмәкәрҙәре Союзы ағзаһы Тәнзилә Ҡалмырҙина коллективтың эшен юғары баһаланы. Ул режиссура йәһәтенән үҙ тәҡдимдәрен һәм иҫкәрмәләрен еткерҙе.

“Ҡыйғы районының йәш таланттары дүртенсе тапҡыр “Өлгөлө театр” исемен раҫланы,” – тип билдәләне Тәнзилә Сәғит ҡыҙы.

Район мәҙәниәт йорто хеҙмәткәрҙәре Г. Ахунов, А. Камалов, Р. Сәхәүетдиновтар спекталдең уңышлы үтеүенә үҙ өлөшөн индергән.

Л. Саҙретдинова фотолары.

Театр етәксеһе Э. Теләүғолова.

Тәнзилә Ҡалмырҙина.