Турнирҙа - иң көслөләр

Радик Зәйнетдин улы милли көрәште ысын күңелдән ярата ине, шуға ла уның иҫтәлегенә беҙҙең районда тап ошондай турнир үткәрелеүе осраҡлы түгел. Унда 88 батыр ҡатнашты, быйыл егеттәр генә түгел, ҡыҙҙар ҙа көс һынашты. Турнир көсөргәнешле барҙы. Спортсылар ике келәм өҫтөндә алышты. Шуныһы һөйөнөслө: беҙҙең батырҙар бар ауырлыҡ категорияларында ла тиерлек призлы урын алды. Ҡыҙҙар араһында 40 килограмға тиклем ауырлыҡ категорияһында беренсе урынды Ф. Миндиярова яуланы. 48 кг тиклемге ауырлыҡ категорияһында Д. Дилмөхәмәтова бер кемгә лә ал бирмәне. 25, 35, 40, 50 килограмға тиклемге ауырлыҡ категорияларында почет пьедесталын тулыһынса беҙҙең егеттәр: А. Дилмөхәмәтов, Т. Мөхәмәтдинов, З. Хакимйәнов, С. Ҡазиханов яуланы. 45 килограмға тиклемге категорияла И. Һаҙыев (Салауат районы), 30 килограмға тиклемге категорияла А. Әхмәтғәлиев (Ҡариҙел районы) еңеүсе булды. Призлы урын алған көрәшселәр почет грамоталары һәм миҙалдар менән бүләкләнде. Ҡунаҡтар өсөн Камаловтар ғаиләһе 2-се һанлы Үрге Ҡыйғы урта мәктәбе ашханаһында киске аш ойошторҙо.

Ф. Ҡазиханов,

йәштәр сәйәсәте, спорт

һәм туризм комитеты рәйесе