Спорт - сәләмәтлеккә юл

Андрей Иванович райондың спорт тормошо менән танышыуҙы яңы һалынып ятҡан объектты – Үрге Ҡыйғы ауылы лицейы спорт залын ҡарауҙан башланы. Район хакимиәте башлығы Ш. Мөхәмәтдинов һәм уҡыу йорто директоры Р. Әхмәҙуллин спорт объектын ашығыс файҙаланыуға индереүҙең мөһимлеге тураһында һөйләне. Артабан министр район үҙәгендәге балалар һәм үҫмерҙәр спорт мәктәбендә булды һәм спорт байрамында ҡатнашты. “Сәләмәт быуын – көслө төбәк” спорт-мәғариф проекты сиктәрендәге байрамда Үрге Ҡыйғы ауылы лицейы, 2-се урта мәктәп, Түбәнге Ҡыйғы, Арыҫлан урта мәктәптәре уҡыусылары сығыш яһаны. Билдәләп үтергә кәрәк, был проекттың координаторы булып БР Йәштәр сәйәсәте һәм спорт министрлығы тора. Сара көрәш буйынса донъя чемпионы, спорт мастеры А. Зөлҡәрнәев менән зарядка яһауҙан башланды. Артабан командалар күңелле старттарҙа һәм эстафетала үҙ етеҙлеген, таҫыллығын күрһәтте. Артабан республиканың йәштәр һәм спорт ведомствоһы етәксеһе БР Йәштәр хоккей лигаһы матчында ҡатнашыусыларҙы – Салауат һәм Ҡыйғы райондары командаларын сәләмләне. Ярыш 2-се урта мәктәп хоккей майҙансығында үтте. “1 ғинуарҙан 11 ғинуарғаса Башҡортостан Республикаһы территорияһында Спорт һәм сәләмәтлек ун көнлөгө үтте. Сәләмәт йәшәү рәүешен пропагандалау, граждандарҙы саф һауала әүҙем ял итеүгә ылыҡтырыу, барлыҡ категория граждандарҙың йөкмәткеле ялын ойоштороу был акцияның төп маҡсаттары булып торҙо. Мин спорт менән һәр төрлө шөғөлләнеүҙе хуплайым, сөнки был сәләмәтлеккә юл булып тора,” – тине министр, ҡыйғыларҙы спорт менән шөғөлләнеүгә саҡырып.
Л. Саҙретдинова. Автор фотоһы.