ХЫЯЛДАР ТОРМОШҠА АША

Яңы спорт сезонына йәш хоккейсыларға стандарт өр-яңы хоккей майҙансығы әҙерләнде. Уны һатып алыуға БР Дәүләт Йыйылышы – Ҡоролтайҙың “Берҙәм Рәсәй” партияһынан депутаты Рифат Ғарипов ҙур матди ярҙам күрһәтте. Үрге Ҡыйғы 2-се урта мәктәбе территорияһында көйәрмәндәр, запас уйынсылар өсөн трибуналары булған хоккей майҙансығын төҙөүгә балалар спортын үҫтереүгә вайымһыҙ ҡарамаған урындағы халыҡ та үҙ өлөшөн индерҙе.
Ниһайәт, хоккейсылар өсөн көтөп алынған көн – боҙ майҙансығын тантаналы асыу мәле килеп етте. Тантанала район хакимиәте башлығы Ш. Мөхәмәтдинов, БР Дәүләт Йыйылышы – Ҡоролтай депутаты Р. Гарипов, район хакимиәте эштәр башҡарыусыһы А. Ғәйфуллин, “Берҙәм Рәсәй” партияһының урындағы бүлексәһе башҡарма комитеты рәйесе В. Сәйфуллин, район мәғариф бүлеге начальнигы И. Һаҙыев һәм ҡунаҡтар – Дыуан районы хоккейсылары ҡатнашты.
“Бар стандарт талаптарға яуап биргән хоккей майҙансығын төҙөү ҡарары быйыл март айында Ҡыйғы районы командаһы Башҡортостан Республикаһының шайбалы хоккей Беренселегендә чемпион исемен яулағас ҡабул ителде. Беҙ ярҙам һорап “Берҙәм Рәсәй” партияһынан Башҡортостан Республикаһы Дәүләт Йыйылышына депутатлыҡҡа кандидат Р. Ғариповҡа мөрәжәғәт иттек. Ул ярҙам итергә вәғәҙә бирҙе. Уның үҙ һүҙенә тоғро булыуы беҙҙе сикһеҙ ҡыуандыра. Шулай уҡ учреждениелар һәм ойошмалар етәкселәре, эшҡыуарҙар ҙур ярҙам күрһәтте. “Беренсе трест” ЯСЙ- һына (Р. Ғарипов), “Ҡыйғы Коммунальщик” ЯСЙ-һына (И. Усманов), шәхси эшҡыуар Р. Әхмәтйәновҡа, Ҡыйғы юл ремонт- төҙөлөш идаралығы, “ГазСтрой- Инвест” ЯСЙ-һы коллективтарына ҙур рәхмәтлебеҙ,” – тип билдәләп китте район башлығы Ш. Мөхәмәтдинов.
Хоккейсыларҙы, көйәрмәндәрҙе һәм тантанала ҡатнашыусыларҙы ҡотлап, Р. Ғарипов был эштәрҙең барыһының да балалар хоккей менән шөғөлләнһен, сәләмәт тормош алып барһын өсөн кәрәклеген билдәләп китте. Районда хоккей менән етди шөғөлләнәләр, балаларҙың һәр төрлө турнирҙарҙа еңеп сығыуы ла ошоно иҫбатлай. “Балаларға физик тәрбиә биреү, улар хаҡында ҡайғыртыу, йәштәр араһында сәләмәт тормош алып барыуҙы пропагандалау – беҙҙең дәүләттең һәм “Берҙәм Рәсәй” партияһының төп бурысы, – тип үҙ сығышын дауам итте Р. Ғарипов. – Илдең, республиканың яҙмышы йәш быуындың ниндәй булып үҫеүенә бәйле. Башҡортостан етәкселеге спортты үҫтереүгә ҙур иғтибар бүлә. Беҙ һәр ыңғай башланғысын күтәреп алырға әҙер. Балаларыбыҙҙы һау-сәләмәт, үҙ иленең ысын патриоттары итеп үҫтереү барыбыҙҙың да уртаҡ бурысы булып тора,” – тине ул һәм спорт ҡоролмаһын төҙөргә ярҙам итеүселәргә рәхмәт хаттарын тапшырҙы.
Асыу символы булған ҡыҙыл таҫманы киҫкәс, хоккейсылар боҙҙо һынап ҡараны һәм шул уҡ көндө Дыуан һәм Ҡыйғы районы хоккейсылары араһында дуҫтарса осрашыу үтте.
Хоккей командаһы тренеры В. Әлтәпов район хакимиәтенең йәш спортсыларға һәр ваҡыт ярҙамға килергә әҙер булыуы, улар алдында торған бар проблеманы хәл итергә ынтылыуы хаҡында һөйләне. “Форма комплекттары һатып алынды, йылы өҫ кейемдәрен алмаштырыу урыны эшләй. Бына хәҙер яңы майҙансыҡ барлыҡҡа килде. Боҙҙоң сифатына балалар һоҡланып бөтә алмай! Ҡыҫҡаһы, спорт менән шөғөлләнеү өсөн бар шарттар ҙа бар, беҙ көйәрмәндәребеҙҙең ышанысын аҡлауға бар көсөбөҙҙө һаласаҡбыҙ,” – тип үҙ тәьҫораттары менән уртаҡлашты һәм, боҙ майҙансығы буш тормаясаҡ, тип ышандырҙы беҙҙе.
С. Исмәғилева. Автор фотоһы.