Яҡташыбыҙ Берләшкән Ғәрәп Әмирлектәрендә Махсус Олимпиада «бронза»һын яуланы

16 йәшлек Оксана Пушкарева Абу-Даби ҡалаһында Бөтә донъя махсус олимпиада уйындарында 100 метрға брасс менән йөҙөү ярышында бронза миҙал яуланы. Был хаҡта Башҡортостандың Йәштәр сәйәсәте һәм спорт министрлығынан хәбәр иттеләр.
Оксана Пушкарева – Туймазы ҡалаһының коррекция мәктәбе тәрбиәләнеүсеһе һәм Бөтә донъя уйындарында берҙән-бер Башҡортостан вәкиле. Ҡыҙға ярышҡа барырға «Рәсәйҙең махсус олимпиадаһы» аҡыл үҫеше йәһәтенән артта ҡалған инвалидтарға булышлыҡ күрһәтеү буйынса йәмәғәт ойошмаһының Башҡортостан төбәк бүлексәһе ярҙам иткән.
8 мартта Берләшкән Ғәрәп Әмирлектәренең баш ҡалаһында башланған уйындар 22-һенә тиклем бара. 190 илдән меңдән ашыу спортсы спорттың 24 төрөндә көс һынаша.