ҠОЯШ, ҠОМ ҺӘМ ВОЛЕЙБОЛ

Пляж волейболы буйынса асыҡ турнир 22-се тапҡыр Иҫке Мөхәмәт ауылына Әй йылғаһы буйына спорт һөйөүселәрҙе һәм көйәрмәндәрҙе йыйҙы. Пляж волейболы бөгөн халыҡтың иң яратҡан спорт төрҙәренең береһе булып тора. Спорт майҙансығына тотош ғаиләһе менән килеүселәр күп.
Ҡом өҫтөндә “баталиялар” ике көн дауам итте. Йәйге спорт төрөн үҙ итеүселәрҙе рәсми вәкилдәр тәбрикләне. Район хакимиәте башлығы Ш. Мөхәмәтдинов, спорт байрамын асып, классик һәм пляж волейболының йылдан-йыл бөтә йәштәге кешеләр араһында популяр була барыуын билдәләне. Шамил Радил улы сараның әҙерлек кимәленә яҡшы баһа бирҙе. Ул барлыҡ спортсыларға – ныҡлы сәләмәтлек, спорт ҡаҙаныштары, тамашасыларға һәм көйәрмәндәргә иһә күңелле ял теләне, турнирҙың инициаторы һәм ойоштороусыһы, спортҡа ҡарата һөйөүен һүҙ менән түгел, эш менән күрһәтеүсе Ә. Кәлимуллинға Ҡыйғы районы муниципаль район хакимиәтенең Рәхмәт хатын тапшырҙы.
Башҡортостан Республикаһы Волейбол федерацияһы башҡарма директоры С. Кирпичников, йыйылыусыларҙы сәләмләп, ауыл райондарында, олимпия спорт төрөн популярлаштырып, бындай турнир уҙғарыу бары тик маҡтауға лайыҡ, тип билдәләне. Буласаҡ чемпиондар үҙ юлын нәҡ ошондай турнирҙарҙан башлай.
Асыҡ турнирҙың тәүге көнөндә 30-ҙан ашыу уҡыусылар командаһы үҙ-ара көрәште. Йәш спортсыларҙың әҙерлек кимәле ярайһы уҡ юғары. Улар күрше райондарҙан ғына түгел, Силәбе өлкәһе ҡалаларынан килгән иң көслө волейболсылар менән уйнап, үҙ тәжрибәләрен арттырҙы, үҙҙәрен бары тик ыңғай яҡтан күрһәтте. Дүрт йәш категорияһында иң оҫта уйынсылар кубок-миҙалдарға лайыҡ булды. Артабан “микс” командалар үҙ-ара ярышты.
Икенсе көнгә ҡомло майҙансыҡтарға өлкән спортсылар сыҡты. Уйындар шулай уҡ бер нисә категорияла барҙы. Һәр ҡатнашыусы ысын спортсы сифаттарын күрһәтте, ләкин иң йылдам һәм таҫылдар ғына почет пьедесталына күтәрелә алды.
30 йәшкә тиклемге ир-егеттәр район хакимиәте тарафынан әҙерләнгән кубоктар һәм бүләктәр өсөн көрәште. БР-ҙың Волейбол федерацияһы кубоктары спорт ветерандары араһындағы ярыштарҙа еңеүселәргә тапшырылды. Ғаилә һәм ҡатын-ҡыҙҙар командалары өсөн наградаларҙы сараның спонсорҙары әҙерләгәйне.
Турнирҙы ябыу тантанаһында Р. Хәкимов башҡарыуында ҡурай моңдары яңғыраны.
Иң кесе ҡатнашыусы – 7 йәшлек И. Кәлимуллин менән иң өлкән волейболсы Э. Ҡондоҙов махсус приздарға лайыҡ булды.
Әсҡәрйән Урал улы, турнирға йомғаҡ яһап, барыһына ла артабанғы уңыштар теләне, өлгәшелгәндәрҙә туҡтап ҡалмайынса, һәр ваҡыт алға ынтылырға, ауырлыҡтарҙы еңергә, яңы үрҙәр яуларға, бер йылдан тағы ла осрашырға саҡырҙы.