ҠАТМАРЛЫ КӨРӘШТӘ ЯУЛАНҒАН ЕҢЕҮ

Йәрәбә һөҙөмтәләренә ярашлы, Ҡыйғы командаһы Әлшәй районынан ҡала икенсе булып сығыш яһаны. Ҡыйғылар өс йәштән уҙған башҡорт тоҡомо һәм йөк аттарында ярышты. Тәүге заезда улар Ҡыйғы районы хакимиәте Кубогы өсөн көрәште. Кибернетика ҡушаматлы өс йәшлек ерән бейә (М. Йосоповтың шәхси хужалығынан) финишҡа беренсе булып сабып инде, ләкин комиссия уны спорт аты тип танып, һөҙөмтәһе иҫәпкә алынманы. Беренсе урынды былтырғы чемпион – 2009 йылғы Буян ҡушаматлы ерән алашала Р. Фазлыев яуланы (Үрге Ҡыйғы ауылы, Р. Фәррәхов шәхси предприятиеһы). Икенсе урынға үҙ шәхси хужалығынан 6 йәшлек Дунай ҡушаматлы айғырҙа Иҫке Мөхәмәт ауылынан И. Заһитов сыҡты.

Һайлап алыу турынан һуң ике ярышсыбыҙ Т. Кусимов исемендәге “Аҡбуҙат” ипподромының өс йәштән уҙған башҡорт тоҡомо аттарында ярышты дауам итте.

Тәүге бәйгелә 1200 м дистанцияла Р. Фазлыевҡа – 4 йәшлек Альянс ҡушаматлы һоро айғыр, ә И. Заһитовҡа 4 йәшлек туры-ҡола Алабай эләкте. Ике һыбайлы ла уңышлы сығыш яһаны. Илшат Заһитов финишҡа өсөнсө булып килеп етте, Алабай 1.53.2 һөҙөмтәһен күрһәтте. Руслан Фазлыев иһә Альянста уларҙы уҙып китте һәм икенсе урынға сыҡты. Альянстың етеҙлеге 1.51.9 булып сыҡты.

Икенсе бәйгелә ярышсылар турнир положениеһына ярашлы билдәләнгән аттарҙа ярышты.

И. Заһитов – Айтуған ҡушаматлы 3 йәшлек ҡола айғырға, ә Р. Фазлыев 2015 йылғы Разлив ҡушаматлы һоро айғырға күсеп ултырҙы.

Ике бәйге йомғаҡтары буйынса 2-се призлы урынды Илшат Ишхужа улы яуланы. Ул IХ этаптың еңеүсеһе кубогына лайыҡ булды. И. Заһитов “Терра Башҡортостан” турнирының 12 сентябрҙә Өфө ҡалаһында үтәсәк финалында ҡатнашасаҡ. Был еңеү уға еңел бирелмәне. Старт алдынан ул тыуған ауылынан атаһы, хеҙмәт ветераны Ишхужа Сабир улының ҡапыл вафат булыуы тураһында ҡайғылы хәбәр алды. Дистанцияла ҡалып, еңеү яулау өсөн уға күпме рухи көс, ихтыяр талап ителеүен аңлауы ауыр түгел.

Еңеүселәрҙе һәм ярышта ҡатнашыусыларҙы район хакимиәте башлығы З. Гордиенко сәләмләне. Зөһрә Мәүлитбай ҡыҙы тырышлыҡтары, тынғыһыҙ хеҙмәттәре өсөн жокейҙарға рәхмәт белдерҙе. Республика кимәлендәге ярышҡа сәфәрҙе ойошторғандары өсөн, ауыл хужалығы бүлеге белгестәре, шулай уҡ ветеринария табибы Ф. Мирхәйҙәров рәхмәт хаттарына лайыҡ булды.

Был этапта чемпион исемен Күгәрсен районынан былтыр финалда еңеү яулаған Динис Ҡорбанаев алды.

Л. Саҙретдинова фотолары.