Еңергә өйрәтә

Уҡытыусы һөнәрен һәр кем төрлө сәбәп буйынса һайлай: кемдер өсөн ул – бала саҡ хыялы, кемдер ғаилә династияһын дауам итә, ә бына Венир Рәфис улы Ғарифйәнов үҙенең яратҡан физкультура уҡытыусылары Р. Хафизов, С. Зиннәтуллин һәм Р. Ғилмутдиновтарға оҡшарға теләй.

Вилә Мәүлит ҡыҙы һәм Рәфис Фәйзрахман улы Ғарифйәновтарҙың кесе улы Венир мәктәптә уҡығанында уҡ төрлө спорт төрҙәре: саңғы, волейбол, футбол, еңел атлетика менән мауыға. Класс, мәктәп намыҫын яҡлап, район һәм республика ярыштарында ҡатнаша. Мәктәпте тамамлауға үҙ яҙмышын уҡытыусы эшмәкәрлеге менән бәйләргә хәл итә. Үҙе алдына уҡыусыларҙы көн һайын физик культура һәм спорт менән шөғөлләнеүгә ылыҡтырыу бурысын ҡуя. 1992 йылда В. Ғарифйәнов балалар һәм үҫмерҙәр спорт мәктәбендә тренер булып эш башлай. 1995 йылда үҙе белем алған Үрге Ҡыйғы 2-се урта мәктәбенә физкультура уҡытыусыһы булып күсә. Һәм бына 30 йыл инде ул балаларҙы еңергә һәм спортта юғары һөҙөмтәләргә ирешергә өйрәтә. Уҡыусылар Венир Рәфис улы етәкселегендә район кимәлендә генә түгел, республика ярыштарында ла еңеү яулай. Мәҫәлән, 2019-2020 уҡыу йылында “Фортуна” ҡыҙҙар командаһы “КЭС-баскет” Бөтә Рәсәй мәктәп лигаһында республика ауыл мәктәптәре араһында еңеүсе була. Ҡыҙҙар шулай уҡ ике йыл рәттән – 2017, 2018 йылдарҙа 3х3 баскетбол буйынса Башҡортостан чемпиондары булыуға өлгәшә.

Венир Рәфис улының күпселек уҡыусылары артабанғы тормошта, бәлки, спорттан алыҫ булыр. Ләкин педагог уларҙы юғары һөҙөмтәгә өлгәшеү өсөн тир түгергә, ауырлыҡтарҙы еңергә, үҙҙәренең генә түгел, башҡаларҙың да уңыштарына ҡыуанырға өйрәткән.