“ӘСӘЙ НАҘЫНДА ИЗГЕЛЕК”

Район ҡатын-ҡыҙҙар советы рәйесе Л. Лоҡманова менән район китапханаһының уҡыу залы мөдире Г. Мирғәлина сараны асып, йылы ҡотлау һүҙҙәре менән сығыш яһаны. Район үҙәк дауаханаһының шәфҡәт туташы булып эшләүсе өлгөлө әсә Зилә Зәйнәшеваға күп йыллыҡ тырыш хеҙмәте өсөн тантаналы шарттарҙа район хакимиәтенең маҡтау ҡағыҙы тапшырылды. Шулай уҡ сараны ойоштороусылар Үрге Ҡыйғы ауылында бер ҡыйыҡ аҫтында ун йылдан ашыу дуҫ һәм татыу йәшәп, бергәләп балалар үҫтергән ҡәйнәле-киленле Гөлйөҙөм менән Эльвира Камалетдиноваларҙы йылы маҡтау һүҙҙәре менән билдәләп үтте.

Артабан районда ҡатын-ҡыҙҙар һәм әсәләр проблемалары буйынса асыҡтан-асыҡ һөйләшеү уҙҙы. Мәҙәниәт, мәғариф, һаулыҡ һаҡлау өлкәһендә ирешелгән ҙур уңыштар менән йәнәшә, ҡатын-ҡыҙҙар араһындағы эскелек проблемаһы әлегә тиклем хәл ителмәй ҡала.

Арыҫлан ауыл биләмәһе ҡатын-ҡыҙҙар советы рәйесе Д. Фәтихова үҙ эшмәкәрлеге менән таныштырҙы, “Ҡатын-ҡыҙҙар һәм әсәйҙәргә ҡағылышлы мәсьәләләр буйынса бергәләп фекер алышыу беҙҙең өсөн ҙур әһәмиәткә эйә,” – тине ул.

Үрге Ҡыйғы ауылы мәсете мөғәлимәһе М. Ғибаҙуллина үҙенең сығышын ҡыҙҙарҙы әхлаҡи яҡтан тәрбиәләүгә арнаны. Шулай уҡ “Башаҡҡай” балалар баҡсаһы тәрбиәсеһе Л. Хужина, “Рәсәй мосолман ҡатын-ҡыҙҙарының Башҡортостан Республикаһындағы союзы” йәмәғәт ойошмаһының урындағы берләшмәһе рәйесе Г. Зарипова файҙалы кәңәштәре менән уртаҡлашты.

Ауыл биләмәләре йәмәғәт ойошмалары рәйестәре урындарҙа үҙ эштәрен яҡшыртыу буйынса файҙалы кәңәштәр алды.

Л. Саҙретдинова.

Автор фотоһы.