Башҡорт дәүләт аграр университеты студенттары ер еләге миҙгелен аса

Башҡорт дәүләт аграр университетының уҡытыу-ғилми үҙәгендә – күптән көтөп алған еләк миҙгеле. 10 июлдән агротехнологиялар һәм урман хужалығы факультеты студенттарының практикаһы башлана. Ул уҡытыу-ғилми үҙәге урынлашҡан Дмитриев ҡасабаһында үтә.

Юғары уҡыу йортоноң матбуғат үҙәгенән хәбәр итеүҙәренсә, быйылғы миҙгелдә был культураның дөйөм майҙаны 1 гектар самаһы тәшкил итә. Уҡытыу-ғилми үҙәгендә «Фестиваль» исемле күп йылдар үрсетелгән эталон сортына өҫтөнлөк бирәләр. Ул уңышлыларҙың береһе булып тора, өҫтәүенә ауырыуҙарға һәм ҡоротҡостарға бирешмәүсән.

Уҡытыу-ғилми үҙәгендә буласаҡ аграр белгестәре производство практикаһы үтә, емеш-еләк культураларын ҡарарға (утау, һыу һибеү), сорттарҙы уңыш буйынса сағыштырырға өйрәнә.