БЕҘҘЕҢ АҒИНӘЙЕБЕҘ

1952 йылда Мәсәк ауылы егете Сөнәғәт Сабиров менән яҙмышын бәйләп, беҙҙең ауылға килен булып төшә. Күп тә үтмәй, Сөнәғәт Әсҡәҙулла улын хәрби хеҙмәткә алалар. Өс йыл ярым десантсы булып хеҙмәт итә. Миңлегөл апай улы Салауат менән уны түҙемһеҙләнеп көтөп ала. Әйләнеп ҡайтҡас, ғаилә башлығы тыуған колхозында механизатор булып эшләй. Ике ул һәм ике ҡыҙ тәрбиәләп үҫтерәләр. Барыһы ла ҡул көсө менән башҡарылған заманда Миңлегөл апай ҙа һис ҡасан тик тормай. Дөйөм хужалыҡта утау, бесән сабыу, келәттә иген елгәреү эштәрендә ҡатнаша. Шул уҡ ваҡытта балалары тураһында хәстәрлек күрә, ауыр эштән һуң кистәрен уларға йылы ойоҡбаштар, бейәләйҙәр бәйләй, әйберҙәр тегә. Үкенескә ҡаршы, Сөнәғәт Әсҡәҙулла улы 1995 йылда баҡыйлыҡҡа китеп барҙы. Бөгөн Миңлегөл Һаҙый ҡыҙы төпсөк улы Сибәғәт менән килене Әлмирә эргәһендә бәхетле ҡартлыҡ кисерә. Был ғаилә Мәсәк ауылында иң өлгөлөләрҙән һанала. Миңлегөл инәй 94-се йәше менән бара. Ауылыбыҙҙың иң оло инәйе ул. “Хеҙмәт ветераны” миҙалы, бик күп юбилей миҙалдары, маҡтау ҡағыҙҙары менән бүләкләнгән. Ауылдаштары уны сикһеҙ ихтирам итә, байрам уңайынан ҡотларға онотмай.