ХАЛЫҠ МӘНФӘҒӘТЕНДӘ

Ошо көндәрҙә район хакимиәте башлығы Ш. Мөхәмәтдинов яңыртылған мәҙәниәт һәм ял паркын асыу тантанаһында ҡатнашты.
“Коммунальщик” ЯСЙ-һы хеҙмәткәрҙәре башҡарған ремонт эштәре сиктәрендә парк зонаһы төҙөкләндерелгән.
Балалар өсөн уйын майҙансығы булдырылған, тротуарҙар яһалған, яңы эскәмйәләр, сүп йәшниктәре, яҡтыртҡыстар ҡуйылған.
Ш. Мөхәмәтдинов ял зонаһын төҙөкләндереүселәрҙең эштәрҙе сифатлы һәм тейешле срокта башҡарыуын билдәләп үтте.
– Ҡыйғылар парктың хәҙер заманса һәм уңайлы ял урынына әйләнеүенә иғтибар итмәй ҡалмағандыр. Паркты яңыртыуға шәхси өлөшөн индереүселәрҙе лә билдәләп үтке килә. Эштәрҙең һөҙөмтәһен юғары баһалап, төҙөлгәнде ҡәҙерләп һаҡларһығыҙ, тип ышанам, – тине Шамил Радил улы.
Шулай уҡ Үрге Ҡыйғы ауыл Советы ауыл биләмәһе хакимиәте башлығы Н. Шәмиев, “Берҙәм Рәсәй” партияһының урындағы бүлексәһе секретары А. Ғәйфуллин төҙөүселәргә рәхмәт һүҙҙәрен еткерҙе.
Эштәрҙе башҡарыусыларға рәхмәт хаттары һәм бүләктәр тапшырылды.
Артабан паркты асыу тантанаһын концерт программаһы дауам итте.
Төҙөкләндерелгән парк буйлап саф һауала оло йәштәгеләрҙең, балаларҙың, коляска этәргән әсәләрҙең йөрөүен, спорт менән шөғөлләнеүселәрҙе күреп, күңел шатлана. Халыҡ өсөн ошондай ял итеү, дуҫтар менән аралашыу урыны булыуы бик шатлыҡлы.
Н. Нәғимов. Автор фотоһы.