АГРАРИЙҘАРҒА – ДАН ҺӘМ ХӨРМӘТ!

Ауыл хеҙмәте еңел түгел, ә тыйнаҡ һәм сабыр ауыл эшсәндәре ата-бабалары тәжрибәһен һәм традицияларын, йәшәү рәүешен дауам итә.
Байрам сараһын район хакимиәте башлығы Ш. Мөхәмәтдинов асты. Йыйылыусыларҙы һөнәри байрамдары менән ҡотлап, ул район именлегенә түккән көс-тырышлыҡтары өсөн рәхмәт белдерҙе. Район агросәнәғәт комплексының төп күрһәткесе – етештерелгән тулайым ауыл хужалығы продукцияһы. 2018 йылдың 9 айында ауыл хужалығы предприятиелары һәм КФХ-лар тарафынан 273,7 миллион һумлыҡ продукция етештерелгән. Продукция етештереү индексы 103,2% булған. Быйыл яҙ һуң килеү сәбәпле, яҙғы баҫыу эштәре аҡрыныраҡ темпта барған, шулай ҙа хужалыҡтар иген һәм мал аҙығы культураларын сәсеүҙе тулы күләмдә башҡарған. Яҙғы сәсеү 8071 гектарҙа бойомға ашырылған, шул иҫәптән яҙғы иген культуралары – 5508, техник культуралар 1419 гектарҙа сәселгән. Ужымдар 1096 гектарҙа һаҡланып ҡалған. Игендәр бөтәһе 6604 га биләгән.
Иң күп ашлыҡ “Әй” АПК-һында йыйып алынған – 2151 тонна. “Үҙәк” МТС-ы Дыуан филиалы – 1883 т, “Красный Урал” АПК-һы 1256 тонна уңыш йыйған. КФХ-лар араһында “Ә. Әхмәтдинов” КФХ- һы иң юғары күрһәткескә ирешкән – 664 тонна. “А. Вәлиев” КФХ-һы – 435 т, “Ф. Закиров” КФХ-һы 375 тонна йыйып алған. 2019 йыл уңышы өсөн яҡшы нигеҙ һалынған – 1700 гектарҙа ужым культуралары, шул иҫәптән 320 гектарҙа ужым бойҙайы, 1380 гектарҙа ужым арышы сәселгән. 3800 га ер туңға һөрөлгән – планға ҡарата 100%.
Хужалыҡтар тарафынан 934 тонна орлоҡ һалынған (планға ҡарата 97,3%), шул иҫәптән бойҙай – 420 тонна, һоло – 290 т, арпа – 50 т, ҡарабойҙай – 100 тонна. Бөгөн хужалыҡтар орлоҡтарҙы анализға яңы тапшыра башлаған. Ферма эшсәндәре ҡатмарлы осорға – мал ҡышлатыуға аяҡ баҫты. Уның нисек үтәсәге мал аҙығы запасына туранан-тура бәйле. Быйыл бесән менән тәьмин ителеш – 138% (17 мең тонна), сенаж – 95% (12 мең т), силос – 100% (1,6 мең т).
9 ай эсендә ауыл хужалығы предприятиелары 23881 центнер һөт етештергән – уҙған йылдың ярашлы осорона ҡарата 98,1%. Уртаса район буйынса һәр 100 һыйырҙан 73 быҙау алынған, был иһә 2017 йылдағынан 5 башҡа күберәк. Әгәр “Әй” АПК-һында – 82, “Красный Урал” АПК-һында 88 быҙау алынһа, “Ғаилә фермаһы” ЯСЙ-һында – ни бары 33, Тимирязев исемендәге АПК-ла – 60.
2018 йылда район ауыл хужалығы тауарҙарын етештереүселәре 6 миллион һумдан ашыу дөйөм суммаға төрлө маркалы 12 берәмек техника һатып алған. Дәүләт һиҙелерлек ярҙам күрһәтә. Ошо йылдың 9 айында 11 миллион 773 мең дөйөм суммалыҡ субсидия алынған.
Артабан эштә айырылып торған ауыл хужалығы хеҙмәтсәндәренә лайыҡлы наградалар тапшырылды.
Район мәҙәниәт йорто һәм художестволы үҙешмәкәрлек коллективтары слетта ҡатнашыусыларға байрам кәйефе бүләк итте. Ауыл хеҙмәтсәндәре был көндө ял итте, артабан эшләү өсөн рухи көс һәм яҡшы кәйеф алды.
Н. Нәғимов.