“ҠАТЫ ЕЛ-ДАУЫЛҒА ҠАРАМАҪТАН, УЛАР АТЛАНЫ ЛА АТЛАНЫ”

Сталинград эргәһендәге еңеү һуғыш барышында хәл иткес роль уйнай. Совет ғәскәрҙәре стратегик инициативаны үҙ ҡулына ала һәм уны һуғыш ахырынаса һаҡлап ҡала. Фашист блогының Сталинград эргәһендәге еңелеүе союздаш- тарының Германияға ҡарата ышанысын кәметә, Европа илдәрендә Ҡаршылыҡ күрһәтеү хәрәкәтенең әүҙемләшеүенә йоғонто яһай. Япония менән Төркиә СССР-ға ҡаршы әүҙем хәрәкәттәр алып барыу планынан баш тартырға мәжбүр була. Сталинград эргәһендәге еңеү Совет ғәскәрҙәренең һынмаҫ рухын, ныҡлығын, ҡаһарманлығын күрһәтә.
Сталинград алышы барышындағы хәрби хеҙмәттәре өсөн, 44 берләшмәгә һәм часҡа почетлы исемдәр бирелә, 55-е ордендар менән бүләкләнә, 183-ө гвардия итеп үҙгәртелә.
Меңәрләгән һалдат һәм офицер хөкүмәт наградаларына лайыҡ була. 112 иң ҡыйыу яугир Советтар Союзы Геройы исемен ала.
Героик оборона хөрмәтенә совет хөкүмәте 1942 йылдың 22 декабрендә “Сталинградты обороналаған өсөн” миҙалын булдыра, уның менән 700 мең кеше бүләкләнә.
1945 йылдың 1 майында Юғары Баш командующийҙың бойороғо менән Сталинград герой-ҡала тип атала. 1965 йылдың 8 майында Бөйөк Ватан һуғышында Еңеүҙең 20 йыллығын байрам итеү хөрмәтенә герой-ҡала Ленин ордены һәм “Алтын йондоҙ” миҙалы менән наградлана.