Республикала йәшәүселәрҙе майҙа 13 ял һәм ике ҡыҫҡартылған эш көнө көтә

Республиканың Хеҙмәт министрлығы Башҡортостанда йәшәүселәрҙең майҙа нисек ял итеүен иҫкә төшөрҙө. Хеҙмәт кодексына ярашлы, биш көнлөк эш аҙнаһында 13 ял һәм ике ҡыҫҡартылған эш көнө була.
Шулай итеп, 1 май – Яҙ һәм Хеҙмәт байрамы һәм 9 май – Еңеү көнө уңайынан төбәк халҡы быйыл 1, 2, 3, 4, 5 һәм 9, 10, 11, 12 майҙа ял итә. Шишәмбе, 30 апрелдә, һәм шаршамбы, 8 майҙа, эш көнө бер сәғәткә ҡыҫҡара.
«Алты көнлөк эш аҙнаһында 2019 йылдың 1, 3, 5 һәм 9, 12 майы ял көндәре булып иҫәпләнә. Шишәмбе, 30 апрелдә, һәм шаршамбы, 8 майҙа, эш көнө бер сәғәткә ҡыҫҡара», — тип хәбәр иттеләр ведомствоның матбуғат хеҙмәтендә.
Байрамдарҙан һуң халыҡты 18, 19, 25 һәм 26 майҙағы ғәҙәти ял көндәре көтә.