ТЕЛ ЯҘМЫШЫ – ИЛ ЯҘМЫШЫ

Съезда Башҡортостан Республикаһы, Ырымбур, Силәбе, Ҡурған, Һамар, Һарытау, Свердловск өлкәләре, Татарстан Республикаһы, Пермь крайы, Ханты-Манси автономиялы округы, Мәскәү ҡалаһы башҡорт теле һәм әҙәбиәте уҡытыусылары, туған телдә белем биргән ойошмаларҙың директорҙары, хакимиәттәрҙең, юғары уҡыу йорттарының туған телдәрҙе уҡытыу өсөн яуаплы белгестәре, йәмәғәтселек вәкилдәре ҡатнашты.
Беҙҙең райондан был сарала мәғариф бүлеге начальнигы И. Һаҙыев, район методика кабинеты етәксеһе И. Мөхәрәмова, Арыҫлан ауылы урта мәктәбе директоры Н. Иҙрисова, башҡорт теле һәм әҙәбиәте уҡытыусылары Н. Низамова (Үрге Ҡыйғы ауылы лицейы), С. Мәхмүтова (Абзай) һәм И. Вәлиәхмәтова (Түбәнге Ҡыйғы) ҡатнашты. Съезд делегаттары Өфө ҡалаһының белем биреү башҡорт телендә алып барылған мәғариф учреждениеларында булды, уларҙа башҡорт теле һәм әҙәбиәте уҡытыусылары тарафынан оҫталыҡ дәрестәре үткәрелде. Форсайт- сессияларҙа туған телдәрҙе өйрәнеү буйынса көнүҙәк мәсьәләләр ҡаралды, кадрҙар мәсьәләһен хәл итеү юлдары асыҡланды, уҡыу материалдары менән тәьмин итеү, башҡорт телен уҡытыу методикаһы хаҡында һүҙ барҙы.
Пленар өлөштә дискуссия майҙасыҡтарында съезда ҡатнашыусылар Башҡортостанда һәм РФ субъекттарында башҡорт телен һаҡлап алып ҡалыу һәм уны үҫтереү мәсьәләләрен ҡараны. Шулай уҡ Башҡортостан Республикаһында башҡорт телен уҡытыу Концепцияһына тәҡдимдәр индерелде. Съезд сиктәрендә педагогия хеҙмәткәрҙәрен Башҡортостан Мәғариф министрлығының һәм дәүләт наградалары менән бүләкләү булды. Түбәнге Ҡыйғы ауылы урта мәктәбе уҡытыусыһы И. Вәлиәхмәтова БР Мәғариф министрлығының Почет грамотаһы менән бүләкләнде.