“ЧЕРНОБЫЛЬ ГЕРОЙЫ” БИЛДӘҺЕ ТАПШЫРЫЛДЫ

Советтар Союзы Геройы Д. Ракшин исемендәге тарих һәм тыуған яҡты өйрәнеү музейында “Бәлә… Чернобыль… Кеше......” тип аталған осрашыу үтте. Радиацион һәләкәттәрҙә һәләк булыусыларҙы иҫкә алыу көнө уңайынан уҙғарылғған был сара үҙәк район китапханаһы менән берлектә ойошторолдо. Унда 2-се урта мәктәп уҡыусылары, Чернобыль АЭС--ында авария эҙемтәләрен бөтөрөүҙә ҡатнашҡан яҡташтарыбыҙ, вафат булған ликвидаторҙарҙың тол ҡалған тормош иптәштәре,

ғаилә ағзалары, “Маяҡ” берекмәһендә авария эҙемтәләрен бөтөрөүселәр, район хакимиәте, пенсия фонды бүлексәһе, ветерандар советы вәкилдәре ҡатнашты.

“Башҡортостан Республикаһы Чернобыль Союзы” төбәк ойошмаһының Ҡыйғы районындағы ойошмаһы рәйесе С. Хәбибрахмановты, беҙҙең райондан тәүгеләрҙән булып ваҡиға урынына ебәрелгән С. Камаев, Ф. Вәлиев, Н. Мәхмүтовтарҙы йыйылыусылар ҙур иғтибар менән тыңланы. “Маяҡ” производство берекмәһендә авария эҙемтәләрен бөтөрөүҙә эшләгән А. Хәбибйәновтың хәтирәләре барыһына ла көслө тәьҫир итте.

Осрашыуҙа ҡатнашыусылар авария эҙемтәләрен бөтөрөү хаҡына үҙ һаулыҡтарын һәм ғүмерҙәрен ҡорбан иткән ауылдаштарын, яҡташтарын бер минут тынлыҡ

менән иҫкә алды.

Район хакимиәте башлығының социаль мәсьәләләр буйынса урынбаҫары А. Ғәйфуллин осрашыуға килгән ликвидаторҙарға ҡаһарманлыҡтары, фиҙакәр хеҙмәттәре өсөн рәхмәт белдерҙе һәм “Чернобыль геройы” билдәләрен, йәмәғәт берекмәләре Союзы идараһы маҡтау ҡағыҙҙарын тапшырҙы.

Г. Мирғәлина, уҡыу залының баш китапханасыһы.