Рәсәй эшҡыуарҙары көнө алдынан районда байрам сараһы үтте.

Тантананы асып, район хакимиәте башлығы Ш. Мөхәмәтдинов 2019 йыл башына районда 366 кесе эшҡыуарлыҡ субъекты, шул иҫәптән 9 кесе предприятие, 71 микропредприятие, 287 шәхси эшҡыуар эшләүен билдәләп китте. Яңы проекттарҙы һәм идеяларҙы тормошҡа ашырыу, баҙар шарттарында үҙ урыныңды таба белеү – ихтирамға лайыҡлы ғәйәт ҙур хеҙмәт. Эшҡыуарҙар, район халҡы ихтыяждарын ҡайғыртып, иҡтисадтың иртәгәһен тыуҙыра, яңы эш урындары булдыра, баҙарҙы тауарҙар һәм хеҙмәттәр менән тәьмин итә, хәйриә эшмәкәрлеген алып бара, Рәсәй эшҡыуарлығының иң яҡшы традицияларын дауам итә. Шамил Радил улы йыйылыусыларҙы байрам уңайынан ҡайнар ҡотланы һәм район үҫешенә тос өлөш индереүсе иң әүҙем эшҡыуарҙарға рәхмәт хаттары тапшырҙы.
Йыйылыусылар алдында шулай уҡ район эшҡыуарҙары Союзы етәксеһе А. Фәизов сығыш яһаны. Ул 90-сы йылдарҙа үҙ эшен асырға ҡыйыулыҡ итеүселәрҙе билдәләп үтте һәм барыһына ла уңыштар, Тыуған илебеҙ именлегенә һөҙөмтәле хеҙмәт теләне.
Артабан балалар ижад коллективтары һәм район мәҙәниәт йорто хеҙмәткәрҙәре байрам концерты ҡуйҙы.