БАШҠОРТ ХАЛҠЫ СЪЕЗЫ

27–29 июндә V Бөтә донъя башҡорттары ҡоролтайы ойошторола. Ҡоролтайҙа халыҡ араһынан һайланған 600-ҙән ашыу делегат, шул иҫәптән АҠШ, Швейцария, Голландия, Монако, Израиль һәм тағы 21 илдең вәкилдәре ҡатнаша.
Унда мөһим мәсьәләләр тикшереләсәк һәм башҡорт халҡы үҫешенең төп йүнәлештәре билдәләнәсәк. Көн тәртибендә – Башҡорт халҡының үҫеш стратегияһы концепцияһын раҫлау, халыҡ тормошоноң төп өлкәләре буйынса ағымдағы хәлгә баһа биреү һәм аныҡ проекттарҙы, программаларҙы тормошҡа ашырыу йәһәтенән тәҡдимдәр.
Съездың төп көнө “Торатау” конгресс-холында уҙа, пленар ултырыштан һуң түбәндәге темалар буйынса һигеҙ секция эш башлай: мәғариф һәм кадрҙар; башҡорт теле; тарих һәм берҙәйлек, демография һәм сәләмәтлек; медиа һәм киң мәғлүмәт саралары; мәҙәниәт һәм сәнғәт; бизнес һәм кооперация; төбәктәрҙәге башҡорттар.
Съезд Ишембай районында, Торатау итәгендә тамамланасаҡ. Унда делегаттар “Торатау йыйыны” республика фольклор байрамында ҡатнашасаҡ. Сара барышында яңы Башҡарма комитет ултырышы һәм Стратегияны бойомға ашырыу буйынса киңәйтелгән эшсе төркөм йыйыу ҡаралған.
Беренсе көндә, шулай уҡ секциялар эшләгән ваҡытта, онлайн-трансляция алып барыла. Теләгән һәр кем фекер алышыуҙарҙы күҙәтә, реаль ваҡыт режимында тәҡдимдәр индерә ала. Тәҡдимдәр индереү механизмы V Бөтә донъя башҡорттары ҡоролтайының рәсми сайтында күрһәтелә.
V съездың эшендә Башҡортостан Башлығы вазифаһын ваҡытлыса башҡарыусы Радий Хәбиров ҡатнаша.