ИНВЕСТ-ҺАБАНТУЙ ҮТТЕ

Инвестицион һабантуй Башҡортостанға 70 миллиард һумлыҡ килешеүҙәр биргән. Сибайҙа үткән Бөтә Рәсәй форумының йомғаҡтары ошондай. Башҡортостандың Урал аръяғына 11 илдән бизнес-йәмәғәтселек вәкилдәре йыйылды.
Башҡортостан Республикаһы Башлығы вазифаһын башҡарыусы Радий Хәбиров: “Беҙҙең маҡсат – Урал аръяғы иҡтисадын “эшләтеп ебәреү”, бында инвесторҙар килһен, эш урындары булдырылһын, яңы социаль объекттар барлыҡҡа килһен өсөн, үҙебеҙҙең барлыҡ мөмкинлектәребеҙҙе күрһәтеү,” – тип билдәләне. Радий Хәбиров потенциаль инвесторҙар менән аралашты. Төркиәнән партнерҙар Башҡортостанда бизнес алып барырға теләй. Дискуссия майҙансыҡтарында территорияларҙы үҫтереүҙең халыҡ-ара тәжрибәһе, ҡала ерен урбанизациялау, экология, туризмды үҫтереү мәсьәләләре тикшерелде.
Форумдың тәүге көнө йомғаҡтары буйынса 922 миллион һум суммалыҡ 3 инвестицион килешеүгә ҡул ҡуйылды. Ә биш килешеүҙең дөйөм портфеле 68 миллиард һумдан артып китте. Проекттар тормошҡа ашырылһа, 1330 яңы эш урыны булдырыласаҡ.
Голливуд актеры Стивен Сигал сараның абруйлы ҡунағы булып торҙо.
Р. Хәбиров әйтеүенсә, актер байрамды күреү өсөн генә килмәгән. “Спорт донъяһында уның абруйы юғары. Беҙ уның менән ошо йүнәлеште үҫтереү тураһында, шул иҫәптән көрәш һарайы булдырыу идеяһы буйынса фекер алыштыҡ. Стивен Сигал – Рәсәй Сит ил эштәре министрлығы махсус вәкиле, шуға ла уға беҙҙең илдең төрлө төбәктәрен күреү ҡыҙыҡлы. Был шәхестең тағы ла бер яғы бар – ул республиканы эре агросәнәғәт бизнесы башлау өсөн вариант булараҡ ҡараған инвесторҙарҙың вәкиле булып тора,” – тип һөйләне Р. Хәбиров.