“ЯҢЫНАН ТЕРГЕҘЕЛГӘН СӘНҒӘТ ТӨРӨ”

Бынан йөҙ йыл элек “синематограф” аппаратын уйлап табалар һәм ошо ваҡыттан башлап кино сәнғәте халыҡ тормошона үтеп инә.

Районда үткән быуаттың аҙағына саҡлы көслө кино селтәре эшләп килде, уның хеҙмәтсәндәре юғары һөҙөмтәләргә ирешә ине. Кино селтәре тарафынан айлыҡ эш планы 160–170 процентҡа үтәлде. Беҙ 1980 йылда Башҡорт АССР-ының район, ҡала киноселтәрҙәре һәм кинотеатрҙары араһында уҙғарылған социалистик ярышта 1-се урын яуланыҡ һәм БАССР-ҙың Дәүләт кино комитеты рәйесе урынбаҫары Т. Фәйзуллин коллективҡа Госкиноның Күсмә Ҡыҙыл байрағын тапшырҙы. Киномеханиктар З. Садиҡов (Түбәнге Ҡыйғы ауылы), Р. Хафизов (Туҡай ауылы), Р. Сиражетдинов (Ләүзә ауылы), Р. Ғимаҙиев (Абзай ауылы), Г. Камалов (Мәсәк ауылы) һәр саҡ алдынғылар рәтендә булды. “Урал” кинотеатрында киномеханиктар Л. Сирғәлина менән Ф. Фәтихов тырышып эшләне. Кино килтереү һәм күрһәтеү буйынса план төҙөүсе кинопрокат методистары Л. Ғәйнетдинова менән Ф. Ғәйфуллина ла үҙ эштәренә яуаплы ҡараны. Водитель Х. Фазылов һәм уның коллегаһы Р. Сәхәүетдинов фильм банкаларын ауылдарға алып барҙы. Ул йылдарҙа районда 15 кино күрһәтеү яйланмаһы эшләне.

Кинопрокат хеҙмәткәрҙәре кинофильмдарҙы халыҡ араһында пропагандалау маҡсатында тамашасылар өсөн байтаҡ ҡыҙыҡлы һәм мауыҡтырғыс саралар үткәрҙе. Мәҫәлән, йыл һайын Совет Армияһы һәм Хәрби диңгеҙ флоты көнөндә Бөйөк Ватан һуғышында ҡатнашыусылар хөрмәтенә киноконцерттар ойошторолдо, “Еңеүгә салют” исеме аҫтында балалар өсөн кино аҙналығы үткәрелде. Шулай уҡ “Светофор”, “Һаулыҡ”, яман ғәҙәттәрҙән ҡотолоуға һәм башҡа темаларға арналған кинофестивалдәр ойошторолдо.

Беҙ, элекке кино селтәре хеҙмәткәрҙәре, районда заманса кинозал асыласағы хаҡындағы яңылыҡты шатланып ҡабул иттек. Бәлки, ваҡыт үтеү менән улар ауылдарҙа ла барлыҡҡа килер, тип уйлайбыҙ.